MeibaumZaege.nl

’T doel van ’t MeibaumZaege is det zoveul meugelik miense plezeer höbbe, zowel de teams die zaege es de toesjouwers. Op dees meneer waerd d’r op sportieve wieze afschied genomme van os meibuim. Neet alles hoof perfect te verloupe, gezelligheid stuit veurop!

 Naodet de meibuim zeen aafgehaold, waere de buim de ieëste zónjig van Juni gezaeg. Wilt ’t zo zeen det op dae datum det jaor Moferter kèrmes is, zal ’t zaege un waek later plaatsvinje. Op versjillende locasies verdeild euver Mofert waere de buim op eine bók gelag, wo ze door de zaegteams zo flot meugelik doorgezaeg motte waere. Un team bestuit oet twieë persoeane. Ederein kint mitdoon, zoeawaal dames- es hieëreteams. Veurdet ’t zaege begint moog de zaeg al óngevieër 2 cm (toet de tenj) in de baum zitte. Op eder locasie is emes aanwezig dae de tieje opnump en dae zorg det alles ieërlik en veilig verlup. Verveur tusse de versjillende locasies is geregeld mit hoefkerre. Neet allein de zaegteams, auch de toesjouwers en supportes kinne hiej veur nieks gebroek van make.

 ’T evenement  begint vanaaf 13:00 oer. Vertrikke kint vanaaf eder locasie. Hiej ligge ouch de wèdstriedformuliere klaor, dus opgaeve van te veure is neet neudig. Om opstoppinge te veurkomme is ’t belangriek det de volgorde op de wèdstriedformuliere waerd aangehaaje. Naodet de teams op alle locasies gezaeg hubbe, motte de wèdstriedformuliere veur 18:30 oer ingeleverd waere biej de Vogel. Hiej waere alle tieje biejein opgetild en de teams mit de lieëgste totaaltied zulle hiej taegenein gaon zaege inne finale. Eder jaor kinne sjoeane prieze gewonne waere. Boete dees prieze krieg ‘t bèste damesteam en ‘t bèste hieëreteam de wisseltrofee mit heives, dae ze ’t jaor d’r nao weer kinne komme verdedige.

 Ondanks det ver d’r alles aan doon om ongelukke te veurkomme, is deilnumme aanne ongerdeile van ’t MeibaumZaege veur eige risico. De organisasie is op gein inkele wieze aansprakelik te stèlle.

 Es ger nach vraoge hub kint ger altied de Vogel belle, telefoon: (0475)541522